Parece ser que tan fendo un museo nel Chao Samartín (Grandas de Salime). El periodista norteamericano de ascendencia asturiana Paul de Zardain escribiu un artículo al respecto que vei a publicar nel periodico de tirada internacional que se fai desde Paris "Herald Tribune". Tamén sale hoy na "Voz de Asturias" y en el portal de internet "Les Noticies". Aquí lo tedes escrito en bable. Merece a pena pararse a leeyo, trata de algo más que del museo, describe de ua maneira muy gráfica como se fain as cousas nesta Asturias nosa.
Chao Samartin: castros de la Edá del Fierro nel occidente asturiano
Les Noticies
Paul de Zardain
24 d’abril 2006
Un IKEA allugase en Chao Samartin
Nel occidente asturiano los castros de la Edá del Fierro son de bayura. Pero una riestra de museos-boutique afalaos pol Principau amenaza con desaniciar el paisaxe arqueolóxicu.
El panorama dende’l sitiu arqueolóxicu de Chao Samartin ye máxicu. Hai aldees de llouxa perdies na borrina del Vale dos Cabalos ya biesques de beduleiros (eiquí son “bidueiros”) vestíes con alique verde. Metanes de marzu el tarrén taba moyao—había díes que tuviera gorgoxando. Esti castro de la Edá del Fierro remóntase al 780-790AC, bien enantes de la conquista romana nel 19AC. Sicasí, el cuadru ye atemporal. Michael Mueller, un collaciu aportao de Frankfurt, dixera qu’el silenciu nun yera normal. “Paez que la ñatura eiquí xurde d’un poema xapones,” dixo mientres desaminaba l’alique. Parte del añu, Michael trabaya nel Tíbet ya prestaba-y l’arniu de misteriu de Chao Samartin. Entós echaramos una güeyada a la llomba delantre del xacimientu. Ehí, en Cima da Vila, taben montando lo que paecía una nave de IKEA.
“Nun che e ningua nave, nin. Eche el novo museo Chao Samartín,” diz Maria Luisa Barcia, que vive n’aldea de Castro. Ensin ser experta n’arquitectura, Maria Luisa nun quier faer comentarios sobro’l proyecto. “Creo que a naide lle guste muito, pero por lo menos creará postos de trabayo," diz ella. El diseño ye’l trabayu de Menéndez y Gamonal Arquitectos SL, un estudiu nel Polígono Industrial d’Olloniegu. Agora tan trabyando nun centro d’interpretación del vino en Pezós, a unos 11km d’eiquí. Na llomba de Cima da Vila, a unos 60m enriba del camín que vei a Xestoselo, los arquitectos diseñaron una estructura a dos bancaes ya 3 anexos en forma de cubo. Tamién van afitar un aparcamientu de 1.840m2. Parte del pieslle esterior, que xa ta instalao na estructura principal, consiste en paneles de formigón prefabricao blanco ya carpintería d’aluminio. Caún de los paneles de formigón pesa 250kg. Les pieces hai que les engaramar en gabitos d’elevación. N’Asturies ye un tipo de pieslle abondo utilizao en naves industriales. Cona sida de que queríen niciar un “diálogo col paisaxe”, Menéndez y Gamonal punxeron-y cuarcita al resto la fachada. Polo xabaz del tarrén, Castro nun ye mui afayaizu p’amosar arquitectura contemporaneo. Seique el problema nun ye tanto el criteriu estéticu, como el madreñazu visual.
Hai tiempu que la prensa internacional ficiera boveda de los escándalos municipales en España lligaos al seutor inmobiliario. Nel 2006, el PIB español vei medrar un 3,2% gracies en parte al seutor de la construcción. L’Economist camienta que fasta el 70% del dinero municipal ta lligao a la venta de llicencies. Dexuro, esto nun ye’l casu de Grandas de Salime, un “concello” perguapo arrequexao xunto a la provincia de Lugo. Escaecíu hai años pola alministración central n’Uvieu, el futuru museu de Chao Samartin quier faer de motor economico pa la xente, que en Grandas son 1.186 según el censo cabeiru. Nun ye una hestoria de corrupteles, sinon de la man dura cona que el gobiernín asturiano apurre-yos a los conceyos cualisquier proyecto col envís de ganar capital político. El paternalismo ye l’arte de cuadriviñar les opciones pa darreu faer usu d’elles con fines partidistes. A la máquina de l’alministración importa-y pouco el seguimientu. Tasferíos los fondos, despreocupase dafeitu. Nel expediente 57/03 de la Conseyería de Cultura d’Uvieu, ou s’atrouxan los planos arquitecturales pa Chao Samartín, nun hai denguna infografía del futuru museu. Germán Barcia, funcionario nel ayuntamientu de Grandas, diz que’l proyeuto aprobarase namai en base a los planos. “El alcalde mandou fer un estudio a ua empresa. Pero a decisión tomouse antes de que vísemos un DVD con ua infografía del museo,” diz Barcia.
“Da pena decilo, pero la nuesa clas política ye lletal. N’outros sitios hai sicasí una migaya de responsabilidá pa conos constituyentes,” diz un arqueólogo asturiano que nun quier asoleyar el sou nom. Como ye funcionariu, tien llercia a que deixen de llamalu a excavaciones. Esi foi el casu d’outro arqueólogo asturiano, Alfonso Fanjul, que fundara l’asociación cívica Cellagú en defensa del patrimoniu hestóricu. El sou papel de “whistleblower” (término que designa a persones que delaten infracciones dientro de una empresa) fizo que nun lo llamaren más pa trabayar nel Serviciu Arqueolóxicu del Principau. Agora, Fanjul trabaya nun castro de la Edá del Fierro na provincia de Lleón, al outro llau de la cordal. “N’Asturies, el seguimientu en grandes proyectos d’infraestructura basase nun par de visites ya dos semeyes. Si veis a la obra de la autovía un domingo pola mañana ye fácil atoupar restos arqueolóxicos de toles époques, como l’empedrao orixinal del Camín de Santiago que denunciaramos hai pouco,” diz Fanjul. El Camín de Santiago ye una ruta de hai 900 años que nel sou pasu per Asturies llamen camín primitivu. Miles de pelegrines extranxeros opten por esti camín porque dicen qu’entiesta l’alma. Pa xente de fuera, un altu nel museu etnográfico de Grandas de Salime, nel que s’atrouxa toa la cultura material de la zuna, ye de rigor. Según l’alcalde, el 20% de los visitantes son estranxeros.
“No que cinca el Chao Samartín, ye una de les numberoses vulneraciones arquitectóniques del paisaxe n’Asturies. Un de los fautores más importantes a la hora d’intervenir nun xacimientu arqueolóxicu ye la conservación de la redolea pa treslladar al visitante la recreación hestórica del monumento nel sou llugar orixinal,” diz Fanjul. Nel casu del proyecto de Menéndez y Gamonal, rompese dafeitu cona redolea faciendo-yos un flaco favor a los visitantes. Ensin seguimiento, Pablo Gamonal ya’l sou socio podríen desaniciar outros restos arqueolóxicos na reigada del Ríu Navia; el proximo ye en Pezós. José Naveiras, direutor del museu etnográfico de Grandas, supunxo que l’actuación museística foi obra de la irresposabilidá cona que ta avezao a actuar la Conseyería de Cultura. Pero Fanjul cuida que les decisiones estétiques, talo como los prefabricaos de formigón blanco, tien la sua llóxica. “La moda pente los arquitectos españoles agora ye xebrar cona paisaxe. Chao Samartín ye un clásicu de como se pue allonxar un edificiu del sou contestu xeolóxicu ya de la coloración del llugar,” diz Fanjul. Nel expediente 57/03 d’Uvieu los arquitectos fain un discurriatu de por qué el museu tien de servir de referencia nel valle: “Entendíamos que un edificio de nueva planta, lejos de ninguna otra edificación que lo mediatizara, debería poseer un carácter y aspecto contemporaneo.” Quién decidiera desaniciar Cima da Vila?
Pablo Gamonal, l’arquitecto encargao, nun quixo retrucar a les llamaes. Chao Samartín nun ye namai un exemplu de paternalismu político o de arquitectos verriondos. El presupuestu tamién ye daqué enrevesao. Como ye un proyecto público ya ta empobinao a afalar el turismo nes comarques del Riu Navia, l’orixe del presupuestu tien que venir de impuestos. Eso, n’outros sitios, fai que el proceso sea tresparente. Pero la mayor parte de les perres, un total de 1.600.000 euros, son foriates. Esto da-yos a los políticos un marxe d’error abondo grande.
Nel 2004, l’alacalde de Grandas reclasificó el tarrén na Cima da Vila (2.500 metros cuadraos) por medio de un plan especial llamau “mutación demanial”. El 30 de xunetu de 2004, el tarrén pasou a manes de la Conseyería de Cultura. Nel intre, al municipiu pasaron-y 120.000 euros pa entamar cona obra. Esa suma, mas outros 264.647 euros, foron solicitaos del programa Proder II. Proder ye un plan de desendolque rural pa les fasteres más desfavorecíes de la Xunión Europea. Nel periodo 2000-06, Asturies magullara 58.3 millones d’euros de tresferencias de Bruseles pa Proder II. Dende Madriz, el presupuestu nacional afitó outros 91.2 millones. La bayura de financiación foriata fai aumentar el peligru conocío n’economia como “moral hazard”, según el cual un inversor fai mala xestión de les cuentes porque el dinero nun-y pertenez. La fase d’edificación, d’alcuerdu col informe de Menéndez y Gamonal, tien un coste de 947.489 euros. Seique nun sabemos como se gastaron eses perres porque la Llei 30/92 del Rexime Xurídicu que regula el procedimientu alministrativu pon torgues pa acceder al expediente 57/03 mientres tea activo. L’expediente trae un despiece de costes pa la obra de Chao Samartín. Nun ye dengún secretu que n’Asturies los proveedores de materiales tan avezaos a pagar a arquitectos de obra pública pa que tean incluíos na llista.
Arriendes, pa proyectos de diseño de menos de 12.000 euros, que foi el caso de Chao Samartín, nun hai concursu público. Un conceyu consultivo na Conseyería de Cultura designa a deu al arquitecto, nesti casu a Menéndez y Gamonal.
Nun yos molestó nin un res que estos arquitectos nun teníen experiencia en xacimientos arqueolóxicos. Naide en Grandas de Salime nun-yos pidiera una infografía del futuru museu nel llugar de Cima da Vila pa valoriar l’impacto visual. Na sua condición d’alcalde de un municipio con poucos medios, Eustaquio Revilla camentara que taba faciendo lo meyor pa la xente de Grandas.
La política llocal d’Asturies davezu tien la opacidá de países como Bielorusia. Con eleiciones rexonales en mayu de 2007, el gobiernu socialista xa ta antainando el ciclo de gastos pa collechar votos. Chao Samartín ta metío nesi ciclo, asina como les “photo opps” de conseyeros del Principau cortando llazos pa tramos d’autovía de 3 kilómetros. La rexón fai frente a tres decades de declive económicu darreu del esbarrumbe de la industria pesao ya de la minería nos años 80. Asturies ye penúltima en medría del PIB en España ya la renta per capita ta 11% embaxo de la media nacional. No que cinca la infraestructura de tresportes, inda nun hai salíes eficientes pa xunise cona sub-rexón económica nin al este nin al oeste. Nun enquivocu l’añu pasau, el presidente rexonal dixera que la mocedá emigrao yera una lleenda urbana.
Menos mal que los ciclos arqueolóxicos tienen más llongura. Inda ta por confirmar, pero l’analis de carbono 14 del cráneo atoupao na cabana ovalao de Chao Samartín podría aserondar la fecha fundacional del castro a 790AC, a finales de la Edá del Bronce. El resto humano, que paez tar mutilao, atouparase dientro d’una caxa de chantos. Según los arqueólogos, el castro tuviera ocupao hai cuasi 3000 años por una élite que mercadiaba con outros castros como San Chuis, nel conceyu Ayande. La minería del ouro yera l’actividá económica principal. L’equipu de Angel Villa tamién atoupara milenta pieces de terra sigillata (cerámica romana de varniz roxo). Una teoría diz que Chao Samartín foi abandonao darreu d’un terremoto violento nel sieglu II depués de Cristo. Les muries de llouxa baltiaran p’adientro, atroxando el cacíu de la xente durante 19 sieglos. Grandas de Salime ta asitiao nuna formación tectónica d’orixe alpino qu’entama en Sarria (Lugo) ya vei dica Navia. Nel casu d’outro episiodio sísmico, los arqueólogos del futuru van tener que teorizar sobre los paneles de 250kg de formigón blanco prefabricao, feitos por El Caleyo. L’inauguración d’un IKEA nel Principau nel año 2005 servirá-yos de referente.
Detalles del museu (Exp. 57/03)
Proyecto: centro d’interpretación (con llaboratoriu, biblioteca, cafetería, párking)
Afalaor: Conseyería d’Educación ya Cultura, Principau d’Asturies
Arquitectos: Menéndez y Gamonal SL (Polígono Industrial d’Olloniegu)
Firma de conveniu: 30 xunetu de 2004
Plan especial: de tarrén xenéricu comunal a museístico
Llugar: Cima da Vila, ente A Hortanova, O Feal ya l’aldea de Castro (Grandas de Salime)
Superficie total de parcela: 2.500 m2
Superficie edificiu principal: 771.40 m2
Superficie anexos: 133.20 m2
Superficie párking: 1.840 m2
Presupuestu total: ca. 1.600.000 euros
Execución material: 947.489.77 euros
Fondos Proder II (tresferencies al municipio): 384.647 euros
Fonte: Exp. 57/03 por Menéndez y Gamonal SL, Conseyería d’Educación ya Cultura
Castros de la Edá del Fierro na reigada del Riu Navia
El Principau tien un plan de 7.4 millones d’euros pa faer un parque hestórico de la reigada del Riu Navia dica al 2008. Una parte del presupuestu, menos de 563.000 euros, tan axeitaos pa trabayos d’escavación arqueolóxico. Concebío como una atracción turística, el parque vei tener tres puntos d’entrada: Puertu Veiga, Tapia de Casariego ya Grandas de Salime. Más museos-boutique tan nel emblau, asina como miradoiros, caleyos pa bicicleta ya rotulación. Hai cuatro outros llugares arqueolóxicos de bayura na veira del Riu Navia. En Pezós, el castro de San Isidro ye l’unicu fortificao con chantos enclavaos na tierra. A 600 metros d’altor, tamién ye’l más altu. Ríu abaxo, na redolea de Bual, ta l’enigmaticu castro de Pendia. Allugao nuna llomba pente una biesca de pinos, les muries de fortificación d’esti castro paecen desaxeraes pal númbero pequeno de cases. Pendia, arriendes la sua topografía remilgosa, cunta con dos baños de vapor embaxo bóvedes de cuarcita. Inda más abaxo hai que posase nel castelón de Cuaña, que xa ta abondo escavao. Eiquí inaugurouse un museu tres la llomba del castro en 1993, tapecíu por una cubierta vexetal. Esti castro, el más visitao por xente foriato, vei tener un nueu centro de recepción pa visitantes. Xa na costa, el castro de Mohías ye un exemplu de diseño urbano ortogonal. Eiquí inda nun se fala de plantar un museu.
Les Noticies
Paul de Zardain
24 d’abril 2006
Un IKEA allugase en Chao Samartin
Nel occidente asturiano los castros de la Edá del Fierro son de bayura. Pero una riestra de museos-boutique afalaos pol Principau amenaza con desaniciar el paisaxe arqueolóxicu.
El panorama dende’l sitiu arqueolóxicu de Chao Samartin ye máxicu. Hai aldees de llouxa perdies na borrina del Vale dos Cabalos ya biesques de beduleiros (eiquí son “bidueiros”) vestíes con alique verde. Metanes de marzu el tarrén taba moyao—había díes que tuviera gorgoxando. Esti castro de la Edá del Fierro remóntase al 780-790AC, bien enantes de la conquista romana nel 19AC. Sicasí, el cuadru ye atemporal. Michael Mueller, un collaciu aportao de Frankfurt, dixera qu’el silenciu nun yera normal. “Paez que la ñatura eiquí xurde d’un poema xapones,” dixo mientres desaminaba l’alique. Parte del añu, Michael trabaya nel Tíbet ya prestaba-y l’arniu de misteriu de Chao Samartin. Entós echaramos una güeyada a la llomba delantre del xacimientu. Ehí, en Cima da Vila, taben montando lo que paecía una nave de IKEA.
“Nun che e ningua nave, nin. Eche el novo museo Chao Samartín,” diz Maria Luisa Barcia, que vive n’aldea de Castro. Ensin ser experta n’arquitectura, Maria Luisa nun quier faer comentarios sobro’l proyecto. “Creo que a naide lle guste muito, pero por lo menos creará postos de trabayo," diz ella. El diseño ye’l trabayu de Menéndez y Gamonal Arquitectos SL, un estudiu nel Polígono Industrial d’Olloniegu. Agora tan trabyando nun centro d’interpretación del vino en Pezós, a unos 11km d’eiquí. Na llomba de Cima da Vila, a unos 60m enriba del camín que vei a Xestoselo, los arquitectos diseñaron una estructura a dos bancaes ya 3 anexos en forma de cubo. Tamién van afitar un aparcamientu de 1.840m2. Parte del pieslle esterior, que xa ta instalao na estructura principal, consiste en paneles de formigón prefabricao blanco ya carpintería d’aluminio. Caún de los paneles de formigón pesa 250kg. Les pieces hai que les engaramar en gabitos d’elevación. N’Asturies ye un tipo de pieslle abondo utilizao en naves industriales. Cona sida de que queríen niciar un “diálogo col paisaxe”, Menéndez y Gamonal punxeron-y cuarcita al resto la fachada. Polo xabaz del tarrén, Castro nun ye mui afayaizu p’amosar arquitectura contemporaneo. Seique el problema nun ye tanto el criteriu estéticu, como el madreñazu visual.
Hai tiempu que la prensa internacional ficiera boveda de los escándalos municipales en España lligaos al seutor inmobiliario. Nel 2006, el PIB español vei medrar un 3,2% gracies en parte al seutor de la construcción. L’Economist camienta que fasta el 70% del dinero municipal ta lligao a la venta de llicencies. Dexuro, esto nun ye’l casu de Grandas de Salime, un “concello” perguapo arrequexao xunto a la provincia de Lugo. Escaecíu hai años pola alministración central n’Uvieu, el futuru museu de Chao Samartin quier faer de motor economico pa la xente, que en Grandas son 1.186 según el censo cabeiru. Nun ye una hestoria de corrupteles, sinon de la man dura cona que el gobiernín asturiano apurre-yos a los conceyos cualisquier proyecto col envís de ganar capital político. El paternalismo ye l’arte de cuadriviñar les opciones pa darreu faer usu d’elles con fines partidistes. A la máquina de l’alministración importa-y pouco el seguimientu. Tasferíos los fondos, despreocupase dafeitu. Nel expediente 57/03 de la Conseyería de Cultura d’Uvieu, ou s’atrouxan los planos arquitecturales pa Chao Samartín, nun hai denguna infografía del futuru museu. Germán Barcia, funcionario nel ayuntamientu de Grandas, diz que’l proyeuto aprobarase namai en base a los planos. “El alcalde mandou fer un estudio a ua empresa. Pero a decisión tomouse antes de que vísemos un DVD con ua infografía del museo,” diz Barcia.
“Da pena decilo, pero la nuesa clas política ye lletal. N’outros sitios hai sicasí una migaya de responsabilidá pa conos constituyentes,” diz un arqueólogo asturiano que nun quier asoleyar el sou nom. Como ye funcionariu, tien llercia a que deixen de llamalu a excavaciones. Esi foi el casu d’outro arqueólogo asturiano, Alfonso Fanjul, que fundara l’asociación cívica Cellagú en defensa del patrimoniu hestóricu. El sou papel de “whistleblower” (término que designa a persones que delaten infracciones dientro de una empresa) fizo que nun lo llamaren más pa trabayar nel Serviciu Arqueolóxicu del Principau. Agora, Fanjul trabaya nun castro de la Edá del Fierro na provincia de Lleón, al outro llau de la cordal. “N’Asturies, el seguimientu en grandes proyectos d’infraestructura basase nun par de visites ya dos semeyes. Si veis a la obra de la autovía un domingo pola mañana ye fácil atoupar restos arqueolóxicos de toles époques, como l’empedrao orixinal del Camín de Santiago que denunciaramos hai pouco,” diz Fanjul. El Camín de Santiago ye una ruta de hai 900 años que nel sou pasu per Asturies llamen camín primitivu. Miles de pelegrines extranxeros opten por esti camín porque dicen qu’entiesta l’alma. Pa xente de fuera, un altu nel museu etnográfico de Grandas de Salime, nel que s’atrouxa toa la cultura material de la zuna, ye de rigor. Según l’alcalde, el 20% de los visitantes son estranxeros.
“No que cinca el Chao Samartín, ye una de les numberoses vulneraciones arquitectóniques del paisaxe n’Asturies. Un de los fautores más importantes a la hora d’intervenir nun xacimientu arqueolóxicu ye la conservación de la redolea pa treslladar al visitante la recreación hestórica del monumento nel sou llugar orixinal,” diz Fanjul. Nel casu del proyecto de Menéndez y Gamonal, rompese dafeitu cona redolea faciendo-yos un flaco favor a los visitantes. Ensin seguimiento, Pablo Gamonal ya’l sou socio podríen desaniciar outros restos arqueolóxicos na reigada del Ríu Navia; el proximo ye en Pezós. José Naveiras, direutor del museu etnográfico de Grandas, supunxo que l’actuación museística foi obra de la irresposabilidá cona que ta avezao a actuar la Conseyería de Cultura. Pero Fanjul cuida que les decisiones estétiques, talo como los prefabricaos de formigón blanco, tien la sua llóxica. “La moda pente los arquitectos españoles agora ye xebrar cona paisaxe. Chao Samartín ye un clásicu de como se pue allonxar un edificiu del sou contestu xeolóxicu ya de la coloración del llugar,” diz Fanjul. Nel expediente 57/03 d’Uvieu los arquitectos fain un discurriatu de por qué el museu tien de servir de referencia nel valle: “Entendíamos que un edificio de nueva planta, lejos de ninguna otra edificación que lo mediatizara, debería poseer un carácter y aspecto contemporaneo.” Quién decidiera desaniciar Cima da Vila?
Pablo Gamonal, l’arquitecto encargao, nun quixo retrucar a les llamaes. Chao Samartín nun ye namai un exemplu de paternalismu político o de arquitectos verriondos. El presupuestu tamién ye daqué enrevesao. Como ye un proyecto público ya ta empobinao a afalar el turismo nes comarques del Riu Navia, l’orixe del presupuestu tien que venir de impuestos. Eso, n’outros sitios, fai que el proceso sea tresparente. Pero la mayor parte de les perres, un total de 1.600.000 euros, son foriates. Esto da-yos a los políticos un marxe d’error abondo grande.
Nel 2004, l’alacalde de Grandas reclasificó el tarrén na Cima da Vila (2.500 metros cuadraos) por medio de un plan especial llamau “mutación demanial”. El 30 de xunetu de 2004, el tarrén pasou a manes de la Conseyería de Cultura. Nel intre, al municipiu pasaron-y 120.000 euros pa entamar cona obra. Esa suma, mas outros 264.647 euros, foron solicitaos del programa Proder II. Proder ye un plan de desendolque rural pa les fasteres más desfavorecíes de la Xunión Europea. Nel periodo 2000-06, Asturies magullara 58.3 millones d’euros de tresferencias de Bruseles pa Proder II. Dende Madriz, el presupuestu nacional afitó outros 91.2 millones. La bayura de financiación foriata fai aumentar el peligru conocío n’economia como “moral hazard”, según el cual un inversor fai mala xestión de les cuentes porque el dinero nun-y pertenez. La fase d’edificación, d’alcuerdu col informe de Menéndez y Gamonal, tien un coste de 947.489 euros. Seique nun sabemos como se gastaron eses perres porque la Llei 30/92 del Rexime Xurídicu que regula el procedimientu alministrativu pon torgues pa acceder al expediente 57/03 mientres tea activo. L’expediente trae un despiece de costes pa la obra de Chao Samartín. Nun ye dengún secretu que n’Asturies los proveedores de materiales tan avezaos a pagar a arquitectos de obra pública pa que tean incluíos na llista.
Arriendes, pa proyectos de diseño de menos de 12.000 euros, que foi el caso de Chao Samartín, nun hai concursu público. Un conceyu consultivo na Conseyería de Cultura designa a deu al arquitecto, nesti casu a Menéndez y Gamonal.
Nun yos molestó nin un res que estos arquitectos nun teníen experiencia en xacimientos arqueolóxicos. Naide en Grandas de Salime nun-yos pidiera una infografía del futuru museu nel llugar de Cima da Vila pa valoriar l’impacto visual. Na sua condición d’alcalde de un municipio con poucos medios, Eustaquio Revilla camentara que taba faciendo lo meyor pa la xente de Grandas.
La política llocal d’Asturies davezu tien la opacidá de países como Bielorusia. Con eleiciones rexonales en mayu de 2007, el gobiernu socialista xa ta antainando el ciclo de gastos pa collechar votos. Chao Samartín ta metío nesi ciclo, asina como les “photo opps” de conseyeros del Principau cortando llazos pa tramos d’autovía de 3 kilómetros. La rexón fai frente a tres decades de declive económicu darreu del esbarrumbe de la industria pesao ya de la minería nos años 80. Asturies ye penúltima en medría del PIB en España ya la renta per capita ta 11% embaxo de la media nacional. No que cinca la infraestructura de tresportes, inda nun hai salíes eficientes pa xunise cona sub-rexón económica nin al este nin al oeste. Nun enquivocu l’añu pasau, el presidente rexonal dixera que la mocedá emigrao yera una lleenda urbana.
Menos mal que los ciclos arqueolóxicos tienen más llongura. Inda ta por confirmar, pero l’analis de carbono 14 del cráneo atoupao na cabana ovalao de Chao Samartín podría aserondar la fecha fundacional del castro a 790AC, a finales de la Edá del Bronce. El resto humano, que paez tar mutilao, atouparase dientro d’una caxa de chantos. Según los arqueólogos, el castro tuviera ocupao hai cuasi 3000 años por una élite que mercadiaba con outros castros como San Chuis, nel conceyu Ayande. La minería del ouro yera l’actividá económica principal. L’equipu de Angel Villa tamién atoupara milenta pieces de terra sigillata (cerámica romana de varniz roxo). Una teoría diz que Chao Samartín foi abandonao darreu d’un terremoto violento nel sieglu II depués de Cristo. Les muries de llouxa baltiaran p’adientro, atroxando el cacíu de la xente durante 19 sieglos. Grandas de Salime ta asitiao nuna formación tectónica d’orixe alpino qu’entama en Sarria (Lugo) ya vei dica Navia. Nel casu d’outro episiodio sísmico, los arqueólogos del futuru van tener que teorizar sobre los paneles de 250kg de formigón blanco prefabricao, feitos por El Caleyo. L’inauguración d’un IKEA nel Principau nel año 2005 servirá-yos de referente.
Detalles del museu (Exp. 57/03)
Proyecto: centro d’interpretación (con llaboratoriu, biblioteca, cafetería, párking)
Afalaor: Conseyería d’Educación ya Cultura, Principau d’Asturies
Arquitectos: Menéndez y Gamonal SL (Polígono Industrial d’Olloniegu)
Firma de conveniu: 30 xunetu de 2004
Plan especial: de tarrén xenéricu comunal a museístico
Llugar: Cima da Vila, ente A Hortanova, O Feal ya l’aldea de Castro (Grandas de Salime)
Superficie total de parcela: 2.500 m2
Superficie edificiu principal: 771.40 m2
Superficie anexos: 133.20 m2
Superficie párking: 1.840 m2
Presupuestu total: ca. 1.600.000 euros
Execución material: 947.489.77 euros
Fondos Proder II (tresferencies al municipio): 384.647 euros
Fonte: Exp. 57/03 por Menéndez y Gamonal SL, Conseyería d’Educación ya Cultura
Castros de la Edá del Fierro na reigada del Riu Navia
El Principau tien un plan de 7.4 millones d’euros pa faer un parque hestórico de la reigada del Riu Navia dica al 2008. Una parte del presupuestu, menos de 563.000 euros, tan axeitaos pa trabayos d’escavación arqueolóxico. Concebío como una atracción turística, el parque vei tener tres puntos d’entrada: Puertu Veiga, Tapia de Casariego ya Grandas de Salime. Más museos-boutique tan nel emblau, asina como miradoiros, caleyos pa bicicleta ya rotulación. Hai cuatro outros llugares arqueolóxicos de bayura na veira del Riu Navia. En Pezós, el castro de San Isidro ye l’unicu fortificao con chantos enclavaos na tierra. A 600 metros d’altor, tamién ye’l más altu. Ríu abaxo, na redolea de Bual, ta l’enigmaticu castro de Pendia. Allugao nuna llomba pente una biesca de pinos, les muries de fortificación d’esti castro paecen desaxeraes pal númbero pequeno de cases. Pendia, arriendes la sua topografía remilgosa, cunta con dos baños de vapor embaxo bóvedes de cuarcita. Inda más abaxo hai que posase nel castelón de Cuaña, que xa ta abondo escavao. Eiquí inaugurouse un museu tres la llomba del castro en 1993, tapecíu por una cubierta vexetal. Esti castro, el más visitao por xente foriato, vei tener un nueu centro de recepción pa visitantes. Xa na costa, el castro de Mohías ye un exemplu de diseño urbano ortogonal. Eiquí inda nun se fala de plantar un museu.
No comments:
Post a Comment